ბათუმში, კორპუსის ნანგრევებიდან მაშველებმა კიდევ 2 ცხედარი ამოიყვანეს. გავრცელებული ინფორმაციით, ნაპოვნია დედა და მისი მოზარდი შვილი, რომელიც შემთხვევისას ონლაინგაკვეთილს ესწრებოდა.
ნანგრევებში ამ დროისთვის ერთ ადამიანს ეძებენ.
ბათუმში, 26 მაისის ქუჩაზე, სადაც საცხოვრებელი კორპუსის სადარბაზო ჩამოინგრა, სამძებრო-სამაშველო ღონისძიებები გრძელდება.
შედეგად მაშველებმა ნანგრევებიდან უკვე 9 ადამიანის ამოყვანა შეძლეს, რომელთაგან 7 გარდაცვლილი იყო. კიდევ ერთი ქალი, 35 წლის ინგა მეკეიძე საავადმყოფოში დღეს გარდაიცვალა, მამაკაცი კი მკურნალობას სამედიცინო დაწესებულებაში აგრძელებს.
მომხდარზე გამოძიება მიმდინარეობს 240-ე მუხლის მე-2 ნაწილით, რაც სწორედ სამშენებლო სამუშაოს წარმოებისას უსაფრთხოების წესის დარღვევას გულისხმობს. სამართალდამცველებმა ამ დროისთვის უკვე სამი ადამიანი დააკავეს.
