რუსეთის საგარეო საქმეთა მინისტრის, სერგეი ლავროვის განცხადებით – დონეცკისა და ლუგანსკის სახალხო რესპუბლიკების აღიარება დონეცკის და ლუგანსკის ოლქების საზღვრებში, დემილიტარიზაცია და დენაციფიკაცია – ეს არის რუსეთის პირობები, რომელსაც უკრაინას მოლაპარაკების დროს წარუდგენენ.
ამის შესახებ ლავროვმა “ალ ჯაზირასთვის” მიცემულ ინტერვიუში განაცხადა, რომელსაც რუსეთის საგარეო უწყება ვებ-გვერდზე ავრცელებს.
“ყირიმი არის თემა, რომელიც არ განიხილება. რუსეთის პრეზიდენტმა, ვლადიმერ პუტინმა მკაფიოდ დააფიქსირა ჩვენი პოზიცია, რომელიც ჩვენმა დელეგაციამ წარმოადგინა ბელარუსში უკრაინელებთან მოლაპარაკებებზე. ყირიმი რუსეთის ნაწილია. დონეცკისა და ლუგანსკის სახალხო რესპუბლიკების აღიარება დონეცკის და ლუგანსკის ოლქები საზღვრებში. დემილიტარიზაცია, რომელსაც უნდა გააჩნდეს პარამეტრები. ისინი ჯერ კიდევ არ არის შეთანხმებული. საერთოდ არ უნდა არსებობდეს იარაღი, რომელიც საფრთხეს უქმნის რუსეთის ფედერაციის უსაფრთხოებას. დენაციფიკაცია, ისევე, როგორც ფაშისტური გერმანია დაექვემდებარა ასეთი პროცედურას,”- განაცხადა ლავროვმა.
ჯერ-ჯერობით უცნობია სად გაიმართება მოლაპარაკებების მეორე რაუნდი.
დრეს ცნობილი გახდა, რომ უკრაინისა და რუსეთის დელეგაციებს შორის მოლაპარაკებათა მეორე რაუნდი უკრაინა-ბელრუსის საზღვარზე, ბელოვეჟსკში აღარ გაიმართება. ამის შესახებ ინფორმაციას სოციალურ ქსელ „ფეისბუქზე“ უკრაინის უმაღლესი რადას დეპუტატი, ფრაქცია „ხალხის მსახურის“ ლიდერი დავით არახამია ავრცელებს.
„მოლაპარაკებები ნამდვილად გაიმართება, მაგრამ ადგილი სხვაა. ყველა დეტალი მოგვიანებით“, – წერს არახამია.
