აშშ-ს ეროვნული დაზვერვის დირექტორი ავრილ ჰეინსი ამბობს, რომ რუსეთის პრეზიდენტი ვლადიმერ პუტინი უკრაინაში ხანგრძლივი ომისთვის მზადაა.
ჰეინსის თქმით, რუსეთის ქმედებები მომდევნო რამდენიმე თვის განმავლობაში, შესაძლოა უფრო არაპროგნოზირებადი გახდეს.
„ამჟამინდელი ტენდენცია ზრდის იმის ალბათობას, რომ პრეზიდენტი პუტინი უფრო რადიკალურ საშუალებებს მიმართავს. პუტინი შეიძლება უფრო არაპროგნოზირებადი გახდეს და შემოიღოს სამხედრო მდგომარეობა რუსეთში.“ – განაცხადა ჰეინსმა სენატის შეიარაღებული ძალების კომიტეტში.
ჰეინსის თქმით, უახლოეს პერიოდში პუტინს სურს დაიპყროს დონეცკისა და ლუგანსკის რეგიონები, ასევე დაამყაროს კონტროლი ქალაქ ხერსონზე და პოტენციურად გააგრძელოს სახმელეთო ხიდი ქვეყნის სამხრეთით, დნესტრისპირეთამდე, მოლდოვის სეპარატისტულ რეგიონამდე, სადაც ამჟამად რუსული ძალები არიან განლაგებული.
