დღეს დილიდან “თბილისი პრაიდის” მოწინააღმდეგე, ძალადობრივი ჯგუფის წარმომადგენლებმა სხვადასხვა მედიასაშუალებების 15-ზე მეტი ჟურნალისტი და ოპერატორი სცემეს. იმის მიუხედავად, რომ ზოგიერთი შემთხვევიდან რამდენიმე საათიც არის უკვე გასული, შსს-ს კომენტარი არ გაუკეთებია და არავინ არის დაკავებული. შინაგან საქმეთა სამინისტროს პრესსამსახურში მსგავსი ინფორმაცია არ აქვთ.
ნაცემ ჟურნალისტებს შორის არიან: ტელეკომპანია “ფორმულას”, “მთავარი არხის”, “რადიო თავისუფლების”, “რუსთავი 2-ის”, “ნეტგაზეთის”, On.ge-ის, “TV პირველის” და სხვა მედიასაშუალების წარმომადგენლები. მათ სიტყვიერ შეურაცხყოფასთან ერთად ფიზიკური შეურაცხყოფაც მიაყენეს. დამტვრეულია მედიასაშუალებების ტექნიკა და მედიის წარმომადგენლების პირადი ტექნიკაც.
