ესტონეთის პრემიერ-მინისტრმა კაია კალასმა აშშ-ის სახელმწიფო მდივანთან ენტონი ბლინკენთან ერთად გამართულ პრესკონფერენციაზე განაცხადა, რომ უნდა მოვემზადოთ უარესისთვის, რადგან უარესი ჯერ კიდევ წინ არის. პრესკონფერენეციაზე კალასი რუსეთის თავისუფალი სამყაროსგან იზოლირების მოწოდებით გამოვიდა და ხაზი გაუსვა უკრაინისადმი ერთობლივი მხარდაჭერის აუცილებლობას.
„ჩვენ გავაგრძელებთ ახალი ინსტრუმენტების მოძიებას ჩვენს „ხელსაწყოების ყუთში“, ვიდრე პუტინის ომის მანქანა არ პარალიზდება“, – დასძინა კალასმა.
სახელმწიფო მდივანმა ბლინკენმა, თავის მხრივ, აღნიშნა, რომ აშშ „აგრძელებს იმედს უკეთესობისკენ“, მაგრამ „უარესისთვისაც მზადაა“.
ამერიკის მთავარი დიპლომატის თქმით, დაღუპულთა და დაჭრილთა რიცხვი სულ უფრო იზრდება და არ წყდება ცნობები ჰუმანიტარულ დერეფნებზე რუსული ძალების მიერ განხორციელებული დაბომბვების შესახებ.
„პრეზიდენტი პუტინი რუსეთს გარიყულად აქცევს“, – თქვა ბლინკენმა და იქვე დასძინა, რომ რუსი ხალხი უკვე გრძნობს ამის შედეგებს.
