იმუნიზაციის ტექნიკურ მრჩეველთა ეროვნული ჯგუფის ხელმძღვანელის, ივანე ჩხაიძის განცხადებით, ჩინური Sinopharm-ისა და Sinovac-ის კორონავირუსის საწინააღმდეგო ვაქცინების ეფექტიანობის სამიზნე ზღურბლი – 50%-ზე მეტი გადალახულია და ეს ორი ვაქცინა საქართველოსთვის სრულიად მისაღებია.
„ამ ორი ვაქცინის ეფექტიანობა სხვადასხვა კვლევაშია შეფასებული. Sinopharm-ი ამ მხრივ აღემატება ეფექტიანობის პროცენტული მაჩვენებლით Sinovac-ს, თუმცა ორივე შემთხვევაში სამიზნე ზღურბლი – 50%-ზე მეტი გადალახულია. ასე რომ, ვფიქრობ, დღეისთვის ქვეყანაში მთავარი პრობლემა არის ვაქცინების რაოდენობა. რაც შეიძლება მეტი ვაქცინა გვჭირდება“, – განაცხადა ჩხაიძემ.
საქართველოში Sinopharm-ით აცრის პროცესი 4 მაისიდან დაიწყება. ქვეყანაში მალე შემოვა Sinovac-ის ვაქცინაც.
