Reuters-ის ინფორმაციით, ამერიკული ფარმაცევტული კომპანია Moderna აცხადებს, რომ კომპანიის კორონავირუსის საწინააღმდეგო ვაქცინა 6-დან 11 წლამდე ასაკის ბავშვებში უსაფრთხოა და ძლიერ იმუნურ პასუხს წარმოქმნის. აღნიშნულს კომპანიის მიერ ჩატარებული კლინიკური კვლევები ცხადყოფს.
გამოცემის ცნობით, კომპანიაში აცხადებენ, რომ კვლევის მონაწილეებმა ვაქცინაცია კარგად გადაიტანეს, ხოლო ვაქცინამ ძლიერი იმუნური პასუხი წარმოქმნა.
კვლევის თანახმად, შემდეგი გვერდითი მოვლენები დაფიქსირდა: დაღლილობა, თავის ტკივილი, ცხელება და ინექციის ადგილის ტკივილი.
კვლევაში 4 753 ბავშვი მონაწილეობდა. კვლევის მონაცემები აშშ-ის სურსათისა და წამლის ადმინისტრაციას გადაეცემა.
