ჩოგბურთელმა ნოვაკ ჯოკოვიჩმა, რომელსაც ანტივაქსერობაში და კოვიდრეგულაციების დარღვევაში ადანაშაულებენ და მისმა მეუღლემ ინვესტიცია ჩადეს დანიურ ფარმაცევტულ კომპანიაში, რომელიც Covid-19-ის სამკურნალო ექსპერიმენტულ წამალზე მუშაობს – ამის შესახებ Bloomberg-ი წერს.
გამოცემის ცნობით, ინფორმაციას QuantBioRes-ის აღმასრულებელი დირექტორი, ივან ლონჩარევიჩი ადასტურებს. მისივე თქმით, წყვილი კომპანიის 80%-ს ფლობს.
QuantBioRes-ს Covid-19-ის წამალი ბაზარზე ჯერ არ გაუტანია. ვებგვერდზე მითითებული ინფორმაციით, კომპანია ექსპერიმენტებს ატარებს, შესაძლებელია თუ არა ვირუსზე ზემოქმედება ე.წ. რეზონანსული ამოცნობის მოდელის მეშვეობით.
დანიის რეესტრის მონაცემებით, მონაკოში მცხოვრებმა ჯოკოვიჩებმა აქციები 2020 წლის ივნისში იყიდეს.
ჩოგბურთის არავაქცინირებულ ვარსკვლავს ამ კვირაში ავსტრალიის ღია პირველობაზე გამოსვლის საშუალება არ მიეცა. ავსტრალიის მთავრობამ მას ვიზა გაუუქმა და ქვეყანა დაატოვებინა.
