დაკავებული ბელარუსელი ჟურნალისტის და აქტივისტის, რამან პროტასევიჩის მშობლებმა გერმანიის კანცლერს, ანგელა მერკელს დახმარების თხოვნით მიმართეს. ინფორმაციას „დოიჩე ველე“ ავრცელებს.
“ძალიან გთხოვთ, ციხეებიდან უდანაშაულო ადამიანების დახსნაში დაგვეხმაროთ. მათ სასწრაფოდ სჭირდებათ დახმარება, რადგან ყოველდღიურად მათზე ძალადობენ და აწამებენ. გთხოვთ, შეაჩერეთ ლუკაშენკო. ყოველი დღე, ყოველი საათი ამ უდანაშაულო ადამიანებისთვის შეიძლება ბოლო აღმოჩნდეს”.- აცხადებენ პროტასევიჩის მშობლები.
ჟურნალისტის მშობლების თქმით, მათი შვილის აღიარებითი ჩვენება, რომელიც ბელარუსის სახელმწიფო ტელევიზიამ გაავრცელა, ძალადობრივი ზეგავლენის შედეგად იყო ჩაწერილი.
ევროპარლამენტმა 23 მაისს ბელარუსში განვითარებულ მოვლენებთან დაკავშირებით ახალი რეზოლუცია მიიღო, რომელიც Ryanair-ის რეისის იძულებით დასმისა და ბელარუსი აქტივისტის, რამან პრატასევიჩის დაკავების ფაქტს სახელმწიფო ტერორისტულ აქტს უწოდებს.
