“დათა ვანიშვილის დაჯილდოების საკითხი პრეზიდენტის ადმინისტრაციაში მისი გარდაცვალებისთანავე იქნა განხილული. პრეზიდენტის ინიციატივის თანახმად, დათა ვანიშვილი სიკვდილის შემდეგ სამოქალაქო თავდადების მედლით დაჯილდოვდება. დაჯილდოების ცერემონია 9 აპრილს, ორბელიანების სასახლეში გაიმართება”, – ნათქვამია განცხადებაში, რომელიც ორბელიანების სასახლის კომუნიკაციის პრესსამსახურმა გაავრცელა.
დათა ვანიშვილი 19 მარტს გარდაიცვალა. ის დღეს დაკრძალეს. დათა ვანიშვილი თავის მეუღლესთან ერთად, 2008 წლის რუსული აგრესიის შემდეგ ოკუპირებულ ტერიტორიაზე მოხვდა. სეპარატისტებმა და რუსებმა საოკუპაციო მავთულხლართი სახლის წინ გაუვლეს. დათა პაპას სახლი არ დაუტოვებია.
