ხელისუფლების წარმომადგენლები აცხადებენ, რომ მზად არიან გადადგან ყველა ის ნაბიჯი, რომელიც ქვეყანას დაახლოებს ევროკავშირთან.
ასევე, მმართველ გუნდში მიაჩნიათ, რომ გარკვეულწილად ოპოზიციასაც ეკისრება პასუხისმგებლობა ამ საკითხთან დაკავშრებით – ამის პარალელურად კი ოპოზიცია მმართველ გუნდს ადანაშაულებს და იმისათვის, რომ საქართველომ კანდიდატი ქვეყნის სტატუსი მიიღოს კონკრეტულ წინადადებასაც კი სთავაზობს ხელისუფლებას.
“უბრალოდ, უნდა დავიდოთ სამი ფურცელი და წავიკითხოთ, რა მოთხოვნები დადგა საქართველოს წინაშე წლის ბოლომდე შესასრულებლად, რა მოლდოვის და რა უკრაინის. ამ მოთხოვნებიდან თუ თემატურად შევაჯამებთ, დავუშვათ, 10 მოთხოვნიდან 9 არის ანალოგიური და ერთადერთი არის საქართველოს სპეციფიკური, რაც სხვა ქვეყნებისადმი წაყენებულ მოთხოვნებში არ გვხვდება, ეს არის დეპოლარიზაცია, ანუ დაძაბულობის შემცირება – ეს არის რეალობა. ევროკავშირი აყენებს თავის პირობებს. მის გადაწყვეტილებებში უხეშად რომ ვთქვათ, ნახევარი დაახლოებით არის პოლიტიკური გადაწყვეტილება და ნახევარი არის დარგობრივი”, -აცხადებს საქართველოს პარლამენტის თავმჯდომარის მოადგილე დავით სერგეენკო.
