საქართველოს პრეზიდენტი სალომე ზურაბიშვილი ევროპული საბჭოს პრეზიდენტს შარლ მიშელს საფრანგეთში შეხვდა. ამის შესახებ ინფორმაციას და შეხვედრის ამსახველ ფოტოს საქართველოს პრეზიდენტის ადმინისტრაცია ავრცელებს, სადაც წერია, რომ მხარეებმა საქართველოში განვითარებული მოვლენები განიხილეს.
“საქართველოს პრეზიდენტმა და ევროპული საბჭოს პრეზიდენტმა შარლ მიშელმა არაფორმალური შეხვედრა გამართეს, სადაც საქართველოში განვითარებული მოვლენები განიხილეს”, – აცხადებენ ადმინისტრაციაში.
თვითმმართველობის არჩევნებამდე ორი თვით ადრე “ქართულმა ოცნებამ” შარლ მიშელის შეთანხმება ანულირებულად გამოაცხადა. პარტიის თავმჯდომარემ, ირაკლი კობახიძემ ბრიფინგზე განაცხადა, რომ შეთანხმებამ თავისი მისია შეასრულა და თავი ამოწურა.
ამ დრომე კომენტარი არ გაუკეთებია ევროპული საბჭოს პრეზიდენტს. გუშინ, პრეზიდენტ შარლ მიშელის მრჩეველმა იურეკ კუჩკიევიჩმა Twitter-ზე დაწერა, რომ ამ ეტაპზე მხარეებთან კონსულტაციები მიმდინარეობს.
