ბავშვთა ქირურგის ლევან ფერაძის განცხადებით, საქართველოში „ომიკრონის“ შტამის გავრცელება კონტროლს აღარ ექვემდებარება, რის გამოც ის მოსახლეობის 99%-ს შეხვდება.
მისი თქმით, შექმნილ ვითარებაში სტატისტიკის წარმოება აზრს კარგავს.
„ეპიდემიოლოგიური სიტუაცია კონტროლს აღარ ექვემდებარება. მეტსაც გეტყვით, რომ სტატისტიკის წარმოებასაც საერთოდ აზრი აღარ აქვს. თუ ეს იქნება მასობრივი და მოიცავს 1-1,5 მლნ ადამიანს, გარკვეულწილად ჰოსპიტალურ სექტორს მაინც დააწვება და მზად ვართ ამისთვის თუ არა, არ ვიცი.
ამასთან, რა თქმა უნდა, კიდევ უფრო დიდი დაწოლა იქნება პირველადი ჯანდაცვის რგოლზე და რესურსი ნამდვილად არ იქნება საკმარისი. ვფიქრობ, ყველა ჩვენგანი დავავადდებით საბოლოო ჯამში. ალბათ ერთეულები გადარჩებიან, 99%-ს შეგვხვდება „ომიკრონი“, – განაცხადა ლევან ფერაძემ.
