„თბილისი ენერჯი“ გლდანის II მიკრო რაიონში მომხდარი უბედური შემთხვევასთან დაკავშირებით, რომელსაც 3 მცირეწლოვანისა და 2 ზრდასრული ადამიანის სიცოცხლე ემსხვერპლა, განცხადებას ავრცელებს და მოსახლეობას გაზის გამათბობლების გამოყენებისას უსაფრთხოების წესების დაცვისკენ მოუწოდებს.
webgazeti.ge „თბილისი ენერჯის“ მიერ გავრცელებულ ინფორმაციას და მიმართვას უცვლელად გთავაზობთ:
„მოხდა უბედური შემთხვევა! გლდანის 2 მ/რ-ში, ერთ-ერთ საცხოვრებელ ბინაში 3 მცირეწლოვანი და 2 ზრდასრული ადამიანი გარდაიცვალა. საგანგებო სიტუაციების სამსახურის თანამშრომლების ინფორმაციით ბინაში შესვლისას მათ გაზქურის ღუმელი ღია და ანთებულ მდგომარეობაში დახვდათ.
უსაფრთხოების ნორმების გათვალისწინებით გაზქურის და მისი ღუმელის გათბობის მიზნით გამოყენება კატეგორიულად დაუშვებელია. ასეთი შემთხვევის დროს ბინაში CO (ცეო) გროვდება, რაც სიცოცხლისთვის სახიფათოა.
ჩვენი სპეციალისტების მიერ, პირველადი დათვალიერების შედეგად ვვარაუდობთ, რომ აღნიშნული ფაქტი უბედური შემთხვევის გამომწვევი მიზეზი გახდა.
ამ ეტაპზე მიმდინარეობს გამოძიება და მისი დასრულების შემდეგ უკვე დაზუსტებით გვეცოდინება მომხდარი ფაქტის გამომწვევი მიზეზები.
გთხოვთ, ნუ გარისკავთ თქვენი და თქვენი ოჯახის წევრების სიცოცხლით, ნუ გამოიყენებთ აკრძალულ დანადგარებს და გაზქურას გასათბობად.
დაიცავით უსაფრთხოების წესები!“.
