Taimer.ge საქართველოს პრემიერ-მინისტრის ბავშვობის ფოტოს ავრცელებს. ფოტოზე პატარა გიორგი გახარია მამასთან და დასთან ერთად არის გადაღებული. გიორგი გახარია 1975 წლის 19 მარტს თბილისში დაიბადა.
პრემიერის მამა ზაურ გახარია წარმოშობით სენაკელია, დედა მზია ლეჟავა კი – თბილისელი. როგორც ინტერნეტით მოძიებული ინფორმაციებიდან ირკვევა, მამა პროფესორი და სახალხო მოძრაობა “სამეგრელოს” კოორდინატორია. დედა კი წლების განმავლობაში მუშაობდა საქართველოს ეროვნულ არქივში.
ambebi.ge-ცოტა ხნის წინ წერდა რომ პრემიერის მშობლები ეროვნული მოძრაობის დროს ზვიად გამსახურდიას განსაკუთრებული მხარდამჭერები იყვნენ და მიტინგებზეც ხშირად დადიოდნენ. სხვა ინფორმაცია გიორგი გახარიას ბავშვობის და ახალგაზრდობის პერიოდის შესახებ მედიისთვის არ არის ცნობილი.
საზოგადოებამ გახარია პირველად 2013 წელს, ბიზნეს ომბუდსმენის თანამდებობაზე დანიშვნისას გაიცნო, საიდანაც დაიწყო მისი კარიერა.
შემდეგ იყო ეკონომიკისა და მდგრადი განვითარების მინისტრი . ეს თანამდებობა 2016-2017 წლებში ეკავა.
მაგრამ ყველაზე მეტად ის ხალხს შინაგან საქმეთა მინისტრის თანამდებობაზე (2017 წლის 13 ნოემბრიდან) დაამახსოვრდა. პარალელურად გახარია იყო ვიცე-პრემიერი და საქართველოს ეროვნული უსაფრთხოების საბჭოს მდივანი.
შინაგან საქმეთა მინისტრის თანამდებობაზე გახარიამ თავი სიმტკიცითა და კატეგორიულობით გამოიჩინა. მის სახელთან არის დაკავშირებული სპეცოპერაცია ღამის კლუბებში, რომელსაც შემდეგ მრავალრიცხოვანი საპროტესტო აქციები მოჰყვა.
საზოგადოებას ახსოვს ასევე არეულობა პანკისის ხეობაში, როდესაც ადგილობრივებმა ჰესის მშენებლობის გამო მასშტაბური პროტესტი გამოთქვეს. აქციის მონაწილეები პოლიციელებს ჯოხებსა და ქვებს ესროდნენ, ხოლო პოლიციამ ცრემლმდენი გაზი და რეზინის ტყვიები გამოიყენა. შედეგად დაშავდა 55 ადამიანი, უმეტესობა – შსს-ს წარმომადგენელი.
ასევე მის სახელს უკავშირდება 20-21 ივნისის აქციის დაშლა. მაშინ საპროტესტო აქციის მონაწილეებმა პარლამენტის შენობაში შეჭრა სცადეს, შემდეგ კი სამოქალაქო აქტივისტებმა გახარიას შს მინისტრობიდან გადადგომა მოითხოვეს.
აქციის მონაწილეთა მოთხოვნა „შესრულდა” – გახარიამ შინაგან საქმეთა მინისტრის პოსტი დატოვა თუმცა მალე ის საქართველოს პრემიერ-მინისტრი გახდა.
ფოტო სააგენტომ timer.ge გაავრცელა
