ჯანდაცვის მინისტრის შერჩევა და წარდგენა არის ირაკლი ღარიბაშვილის პრეროგატივა. შესაბამისად, ჩვენ საპარლამენტო გუნდში არ გავაკეთებთ რამე წინასწარ განცხადებებს ამაზე – ამის შესახებ საქართველოს პარლამენტის ვიცე-სპიკერმა, არჩილ თალაკვაძემ ტელეკომპანია “იმედთან” განაცხადა.
თალაკვაძის თქმით, ჯანდაცვის სფეროში განხორციელებული რეფორმები “ქართული ოცნების” ერთ-ერთი მთავარი მიღწევაა.
“ჯანდაცვა და ჯანდაცვის სფეროში განხორციელებული რეფორმები არის ის პრიორიტეტი, რომელიც ქართულ ოცნებას ყოველთვის ეამაყება და ჩვენთვის საამაყოა, რომ ამ წლების განმავლობაში შევძელით უამრავი ჩვენი თანამოქალაქის გადარჩენა, ადეკვატური სამედიცინო მომსახურების მიწოდება და დაფინანსება, დავიწყეთ C ჰეპატიტის პროგრამა, რომელმაც 80 000 ადამიანი გადაარჩინა, აშენდა ბევრი მნიშვნელოვანი სამედიცინო ინფრასტრუქტურული პროექტი ამ წლების განმავლობაში და ბევრი რამ გაკეთდა მართლა ჯანდაცვაში და შეიძლება ითქვას, რომ ჯანდაცვა არის ქართული ოცნების ერთ-ერთი მთავარი მიღწევა.
შესაბამისად, ჩვენი, როგორც პოლიტიკური გუნდის ინტერესი და ყურადღება ძალიან მაღალია იმ კონსულტაციების მიმართ, რომელიც პრემიერმინისტრთან იმართება ჯანდაცვის ახალი მინისტრის შესარჩევად. მინისტრის შერჩევა და წარდგენა არის ირაკლი ღარიბაშვილის პრეროგატივა. შესაბამისად, ჩვენ საპარლამენტო გუნდში არ გავაკეთებთ რამე წინასწარ განცხადებებს ამაზე” – განაცხადა თალაკვაძემ.
