პარლამენტის ოპოზიციონერ წევრებს ბადრი ჯაფარიძეს, შალვა ნათელაშვილსა და ელენე ხოშტარიასა სადეპუტატო უფლებამოსილება შეუწყდათ.
პარლამენტის პლენარულ სხდომაზე აღნიშნულ საკითხთან დაკავშირებით ხანგრძლივი დებატების შემდეგ კენჭისყრა ჩატარდა. გადაწყვეტილების მიღების დროს სასესიო დარბაზში იმყოფებოდა ბადრი ჯაფარიძე.
დეპუტატებისათვის უფლებამოსილების შეწყვეტაზე მომზადებული დადგენილებები შემდეგი შედეგით მიიღეს:
ბადრი ჯაფარიძე 77 – მომხრე; 38- წინააღმდეგი;
შალვა ნათელაშვილი 79 – მომხრე; 28 – წინააღმდეგი;
ელენე ხოშტარია 77 – მომხრე; 9 – წინააღმდეგი;
პირადი განცხადების საფუძველზე სადეპუტატო უფლებამოსილება შეუწყდა პარლამენტის ყოფილ თავმჯდომარეს კახა კუჭავას.
ელენე ხოშტარიასთვის და შალვა ნათელაშვილისთვის მანდატების შეწყვეტის საფუძველი მათ მიერ პლენარული სხდომების არასაპატიო მიზეზით გაცდენა გახდა.
რაც შეეხება “ლელოს“ ლიდერის, ბადრი ჯაფარიძისთვის მანდატის შეწყვეტის საკითხს, ამის ფორმალურ-სამართლებრივ საფუძველი მის წინააღმდეგ თბილისის საქალაქო სასამართლოს მიერ გამოტანილი გამამტყუნებელი განაჩენი გახდა.
