ამჟამინდელ COVID 19-ის ვაქცინებს შესაძლოა განახლება დასჭირდეთ, რათა უზრუნველყონ ეფექტიანობა „ომიკრონის“ და კორონავირუსის მომავალი ვარიანტების წინააღმდეგ, – ამის შესახებ ჯანდაცვის მსოფლიო ორგანიზაციის ტექნიკურმა ჯგუფმა განაცხადა.
ტექნიკური ჯგუფი, რომელიც შედგება დამოუკიდებელი ექსპერტებისგან, ამბობს, რომ განიხილავს ვაქცინაციის შემადგენლობის ცვლილებას.
„ამჟამინდელი COVID 19-ის ვაქცინების განახლება შეიძლება საჭირო გახდეს, რათა ვაქცინებმა კვლავ უზრუნველყონ ჯანმოს მიერ რეკომენდებული დონის დაცვა. COVID 19-ის ვაქცინებმა უნდა გამოიწვიონ იმუნური პასუხი, რომელიც არის ფართო, ძლიერი და გრძელვადიანი, რათა შემცირდეს გამაძლიერებელი დოზების საჭიროება“, – აღნიშნა ტექნიკურმა ორგანომ, რომელსაც ევალება რეკომენდაციების მიცემა WHO-სთვის.
