ვიცე-პრემიერის, ეკონომიკისა და მდგრადი განვითარების მინისტრის, ლევან დავითაშვილის განცხადებით, მაღალი ინფლაცია ყველა ქვეყნის გამოწვევაა.
როგორც მან მთავრობის სხდომის დასრულების შემდეგ გამართულ ბრიფინგზე აღნიშნა, ინფლაციის ზრდას ხელი უკრაინაში მიმდინარე ომმა შეუწყო.
„ზოგადად, ინფლაციური წნეხი ალბათ, ყველაზე დიდი გამოწვევაა დღეს ბევრი ქვეყნის ეკონომიკისთვის, მათ შორის საქართველოსთვისაც. გვესმის, რომ მიწოდების შეფერხებიდან გამომდინარე, ინფლაცია ომიდან მომდინარეობს. მსგავსი შინაარსისაა, როგორც პანდემიის პირობებში იყო, როდესაც მიწოდების ჯაჭვების წყვეტა ხდებოდა. იგივე გამოიწვია ომმა და ომიდან მომდინარე, შესაბამისმა სანქციებმაც. ძირითადად, დეფიციტურობამ განაპირობა ინფლაციის ზრდა. საკმაოდ მაღალი ინფლაციაა ყველა ქვეყანაში“, – განაცხადა დავითაშვილმა.
