1991 წლის 31 მარტს, საქართველოს მთელ ტერიტორიაზე, საქართველოს სახელმწიფოებრივი დამოუკიდებლობის აღდგენის რეფერენდუმი გაიმართა, მისი შედეგების საფუძველზე კი – უზენაესმა საბჭომ დამოუკიდებლობის აქტი მიიღო.
სარეფერენდუმო კითხვას – თანახმა ხართ თუ არა, აღდგეს საქართველოს სახელმწიფოებრივი დამოუკიდებლობა, 1918 წლის დამოუკიდებლობის აქტის საფუძველზე, პასუხი – დიახ – 3 295 000 ადამიანმა დაადასტურა, რაც კენჭისყრის მონაწილეთა 99.8%-ს შეადგენდა.
ეს იყო უკანასკნელი რეფერენდუმი, რომელიც საქართველოს მთელ ტერიტორიაზე, აფხაზეთისა და სამხრეთ ოსეთის ყოფილი ავტონომიური ოლქის ჩათვლით ჩატარდა.
რეფერენდუმიდან ცხრა დღეში, საქართველოს უზენაეს საბჭოზე, ზვიად გამსახურდიამ საქართველოს დამოუკიდებლობის აღდგენა გამოაცხადა.
