ჯანდაცვის მსოფლიო ორგანიზაციამ კორონავირუსის საწინააღმდეგო ვაქცინა „ასტრაზენეკაზე“ დასკვნა გამოაქვეყნა, რომლის თანახმადაც, აღნიშნულ ვაქცინას უფრო მეტი სარგებელი მოაქვს ვიდრე რისკი.
როგორც WHO-ს მიერ გავრცელებულ დასკვნაშია აღნიშნული, ექსპერტთა ჯგუფმა „ასტრაზენეკასა“ და თრომბოემბოლიას შორის მიზეზშედეგობრივი კავშირი ვერ იპოვა.
ჯანდაცვის მსოფლიო ორგანიზაციაში მიიჩნევენ, რომ ვაქცინაცია, მათ შორის „ასტრაზენეკათი“ არის ერთადერთი გამოსავალი, რათა მსოფლიომ კორონავირუსით გამოწვეული სიკვდილიანობა შეამციროს.
“ასტრაზენეკას“ მოაქვს უფრო მეტი სარგებელი ვიდრე რისკი. მას აქვს დიდი პოტენციალი იმისა, რომ შეამციროს სიკვდილიანობა გამოწვეული კორონავირუსით. თრომბოემბოლიის შემთხვევები ვაქცინაციის შემდეგ შეესაბამება ამ მდგომარეობათა დიაგნოზების მოსალოდნელ რაოდენობას. ის შეიძლება განვითარდეს ბუნებრივი სახით და იშვიათი არ არის. ვენური თრომბოზი, ასევე ფილტვების თრომბოემბოლია შეიძლება მოხდეს ვაქცინის შემდეგაც.
ევროპის წამლების სააგენტომ 18 აცრილი ადამიანის გამოკვლევა ჩაატარა და დაადგინა, რომ თრომბოემბოლია ვაქცინასციასთან უშუალო კავშირში არ არის”, – აცხადებენ WHO-ში.
ჯანდაცვის მსოფლიო ორგანიზაცია მიიჩნევს, რომ ვაქცინაციასთან დაკავშირებით მედიკოსებისა და მოქალაქეების საინფორმაციო კამპანია უნდა ჩატარდეს, “იმისთვის, რომ ადამიანებს ჰქონდეთ მეტი ინფორმაცია ვაქცინაციის შემდგომი გვერდითი მოვლენების შესახებ და მათ დროულად მიმართონ სამედიცინო დაწესებულებას, დახმარების მისაღებად”.
