კოლუმბიის თავდაცვის მინისტრი კარლოს ოლმეს ტრუხილიო „კოვიდ-19-ით“ გამოწვეული ვირუსული პნევმონიით გარდაიცვალა.
ინფორმაციას სააგენტო „როიტერი“ კოლუმბიის მთავრობაზე დაყრდნობით ავრცელებს.
69 წლის ტრუხილიოს კორონავირუსით ინფიცირების შესახებ იანვრის დასაწყისში გახდა ცნობილი. ის ბოგოტაში, სამხედრო ჰოსპიტალის ინტენსიური თერაპიის განყოფილებაში მკურნალობდა.
თავდაცვის მინისტრად დანიშვნამდე, კარლოს ოლმეს ტრუხილიო საგარეო საქმეთა სამინისტროს ხელმძღვანელობდა. ასევე, იკავებდა ქალაქ კალის მერის, შინაგან საქმეთა და განათლების მინისტრის თანამდებობებს, იყო კოლუმბიის ეროვნული ასამბლეის წევრი.
კოლუმბიაში რეგისტრირებულია კორონავირუსით ინფიცირების 2 მილიონზე მეტი და გარდაცვალების 52 ათასამდე შემთხვევა.
