შვედეთის პირველი ქალი პრემიერ-მინისტრი პოსტზე არჩევიდან რამდენიმე საათში თანამდებობიდან გადადგა.
მაგდალენა ანდერსონი პრემიერად ოთხშაბათს აირჩიეს. გადადგომის მიზეზი კი, მწვანეთა პარტიის გადაწყვეტილება გახდა – დატოვოს კოალიცია ანდერსონის სოციალ-დემოკრატიულ პარტიასთან. გარდა ამისა, პარლამენტმა ქვეყნის წარმოდგენილი ბიუჯეტის დამტკიცებაზეც უარი თქვა.
“არსებობს საკონსტიტუციო პრაქტიკა, რომლის თანახმადაც, კოალიციური მთავრობა უნდა გადადგეს, როდესაც ერთი პარტია მას ტოვებს. არ მსურს ვხელმძღვანელობდე მთავრობას, რომლის ლეგიტიმურობაც ეჭვის ქვეშ დადგება”, – განაცხადა მაგდალენა ანდერსონმა. ინფორმაციას BBC ავრცელებს.
ანდერსონის განცხადებით, იგი არ ტოვებს შვედურ პოლიტიკას და შეეცდება კვლავ გახდეს ქვეყნის პრემიერ-მინისტრი.
კერძოდ, პარლამენტის სპიკერი პარტიის ლიდერებთან ახლა მოლაპარაკებების ახალ რაუნდს დაიწყებს. ამის შედეგად შესაძლოა, რომ ანდერსონის კანდიდატურა კვლავ იქნას წარდგენილი – თუმცა არა როგორც კოალიციური მთავრობის პრემიერის, არამედ უმცირესობის კაბინეტის პრემიერის, რომელსაც სოციალ-დემოკრატიული პარტია ჩამოაყალიბებს.
მაგდალენა ანდერსონის არჩევამდე შვედეთი ჩრდილოეთ ევროპის ერთადერთი ქვეყანა იყო, რომელსაც ქალი ლიდერი აქამდე არ ჰყოლია. 54 წლის ანდერსონმა ამ პოსტზე სტეფან ლევენი შეცვალა.
