ზუგდიდში, დადიანების სასახლეთა ისტორიულ–არქიტექტურული მუზეუმის ეზოდან კოლხური ქალი-ღვთაების ბრინჯაოს ქანდაკება მოიპარეს. მუზეუმის დირექტორის ანზორ ოყუჯავას თქმით, მუზეუმის დაცვის თანამშრომელმა დღეს დილით 9-დან 10 საათამდე გეგმური შემოვლისას აღმოაჩინეს, რომ ეზოში ქანდაკება არ იდგა.
შსს-ის განცხადებით, გამოძიება სისხლის სამართლის კოდექსის 183-ე მუხლით დაიწყო, რაც გულისხმობს განსაკუთრებული ისტორიული, კულტურული, მეცნიერული, ან ეროვნული ღირებულების ნივთის, ან დოკუმენტის დაუფლებას მართლსაწინააღმდეგო მისაკუთრების მიზნით.
სამართალდამცელებს ჯერჯერობით არავინ დაუკავებიათ.
კოლხური ქალ-ღვთაების ბრინჯაოს ქანდაკება დადიანების ეზოში 2018 წელს დადგეს. ის ზუგდიდის სოფელ ცაიშში რამდენიმე წლის წინ აღმოჩენილი ბრინჯაოს მხედარი ქალის სკულპტურის ასლია, რომელიც ძველი წელთაღრიცხვის მეშვიდე-მერვე საუკუნეებით თარიღდება.
2018 წელსვე, სკულპტურა, დადიანების ეზოში დადგმიდან რამდენიმე თვეში უცნობმა პირებმა დააზიანეს. ის აღდგენის შემდეგ იმავე ადგილზე განთავსდა.
